పాలెం శ్రీ వెంకటేశ్వర స్వామి దేవస్థాన ప్రాంగణంలో అక్షయ పాత్రను ప్రారంభించిన హరే రామ హరే కృష్ణ సంస్థ ప్రతినిధులు

తొలి కిరణం న్యూస్, నాగర్ కర్నూల్ , ఆగస్టు 9: నాగర్‌కర్నూల్ జిల్లా పాలెం గ్రామంలోని శ్రీ వెంకటేశ్వర స్వామి దేవస్థాన ప్రాంగణంలో హరే రామ హరే కృష్ణ సంస్థ ఆధ్వర్యంలో అక్షయ పాత్రను ప్రారంభించారు. భక్తులు, ఆలయానికి వచ్చే సందర్శకులకు ఆహారం అందించాలనే ఉద్దేశంతో ఈ కార్యక్రమాన్ని చేపట్టినట్లు నిర్వాహకులు తెలిపారు. ఈ సందర్భంగా ఆలయ ప్రాంగణంలో భక్తులకు అన్నప్రసాదం అందించే కార్యక్రమానికి శ్రీకారం చుట్టారు. “ఫుడ్ ఫర్ ఆల్” అనే లక్ష్యంతో ఎవరూ ఆకలితో ఉండకూడదనే సంకల్పంతో సంస్థ సేవా కార్యక్రమాలను నిర్వహిస్తున్నట్లు తెలిపారు. అనంతరం పాలెం గ్రామ పెద్దలతో సమావేశం ఏర్పాటు చేసి, అక్షయ పాత్ర ద్వారా చేపట్టే సేవా కార్యక్రమాలపై చర్చించారు. గ్రామ ప్రజలు, భక్తులు ఈ సేవా కార్యక్రమానికి సహకరించాలని నిర్వాహకులు కోరారు. కార్యక్రమంలో హరే రామ హరే కృష్ణ సంస్థ ప్రతినిధులు, ఆలయ నిర్వాహకులు, గ్రామ పెద్దలు, భక్తులు తదితరులు పాల్గొన్నారు.