చిట్వేలి తొలి కిరణం న్యూస్ అక్టోబర్ 4న: తిరుపతి జిల్లా రైల్వే కోడూరు నియోజకవర్గ పరిధిలో రాబోయే ఎన్నికలను దృష్టిలో ఉంచుకుని సమస్యాత్మక ప్రాంతాల్లో పోలీసు శాఖ భద్రతా చర్యలను ముమ్మరం చేసింది. తిరుపతి జిల్లా ఎస్పీ ఎల్. సుబ్బరాయుడు ఐపీఎస్ ఆదేశాల మేరకు రేణిగుంట డీఎస్పీ వై. శ్రీనివాసరావు, కోడూరు సర్కిల్ సీఐతో కలిసి కోడూరు రూరల్ సర్కిల్ పరిధిలోని ఓబులవారిపల్లె, పుల్లంపేట, చిట్వేలి మండలాల్లోని సమస్యాత్మక గ్రామాల్లో పర్యటించారు.
ఈ సందర్భంగా ఆయా ప్రాంతాల్లోని పోలింగ్ కేంద్రాలను క్షేత్రస్థాయిలో పరిశీలించి భద్రతా ఏర్పాట్లు, మౌలిక సదుపాయాలను క్షుణ్ణంగా తనిఖీ చేశారు. పోలింగ్ కేంద్రాల్లో ప్రహరీ గోడలు, విద్యుత్ సౌకర్యం, తాగునీరు, మరుగుదొడ్లు, ర్యాంపులు, ప్రవేశం–నిష్క్రమణ మార్గాలు, వాహనాల రాకపోకలకు అనువైన మార్గాలను పరిశీలించారు.
అలాగే డ్రోన్ కెమెరాల సహాయంతో పోలింగ్ కేంద్రాల పరిసరాలు, ప్రధాన రహదారులు, భద్రతాపరంగా కీలకమైన ప్రాంతాలను ఏరియల్ సర్వే ద్వారా క్షుణ్ణంగా పరిశీలించారు. ఎన్నికల సమయంలో ఎలాంటి అవాంఛనీయ సంఘటనలు చోటుచేసుకోకుండా ముందస్తు భద్రతా చర్యల్లో భాగంగా డ్రోన్ నిఘాకు ప్రాధాన్యత ఇస్తున్నట్లు అధికారులు తెలిపారు.
ఈ కార్యక్రమంలో పుల్లంపేట ఎస్సై వి. చిన్నరెడ్డప్ప, ఎస్సై ఎస్. వినోద్ కుమార్‌తో పాటు పోలీసు సిబ్బంది పాల్గొన్నారు.
కథనానికి సంబంధించిన ట్యాగ్‌లు (Tags):