గాంధీ జయంతి ఆంక్షలు గాలికి.. తెలకపల్లిలో యథేచ్ఛగా మద్యం, మాంసం విక్రయాలు!

తెలకపల్లి, అక్టోబర్ 2, తొలి కిరణం: మహాత్మా గాంధీ జయంతి సందర్భంగా ప్రభుత్వం విధించిన ఆంక్షలు తెలకపల్లి మండల కేంద్రంలో అమలుకు నోచుకోలేదనే ఆరోపణలు వినిపిస్తున్నాయి. గాంధీ జయంతి సందర్భంగా వధశాలలు, మాంసం దుకాణాలు మూసివేయాలని, మద్యం విక్రయాలు చేపట్టరాదని గ్రామ పంచాయతీ కార్యదర్శి ముందుగానే వ్యాపారులకు నోటీసులు జారీ చేసినప్పటికీ, పలుచోట్ల నిబంధనలు ఉల్లంఘించినట్లు స్థానికులు ఆరోపిస్తున్నారు. కొన్ని చికెన్ దుకాణాలు, హోటళ్లలో మాంసాహార వంటకాలు విక్రయించడంతో పాటు, మద్యం కూడా దొడ్డిదారిన విక్రయించినట్లు ఆరోపణలు ఉన్నాయి. నిబంధనలు ఉల్లంఘిస్తే కఠిన చర్యలు తీసుకుంటామని నోటీసుల్లో హెచ్చరించినప్పటికీ, వ్యాపారులు వాటిని పట్టించుకోలేదని స్థానికులు అంటున్నారు. ముందస్తుగా నోటీసులు జారీ చేసిన అధికారులు గాంధీ జయంతి రోజున క్షేత్రస్థాయిలో తనిఖీలు నిర్వహించకపోవడంపై ప్రజలు అసంతృప్తి వ్యక్తం చేస్తున్నారు. పంచాయతీ, ఎక్సైజ్, పోలీస్ శాఖల మధ్య సమన్వయ లోపం కారణంగానే నిబంధనల ఉల్లంఘనకు అవకాశం ఏర్పడిందని స్థానికులు ఆరోపిస్తున్నారు. ప్రభుత్వ ఆదేశాలను, పంచాయతీ నోటీసులను ఉల్లంఘించినట్లు ఆరోపణలు ఎదుర్కొంటున్న హోటళ్లు, మాంసం దుకాణాలు, మద్యం విక్రయాలపై అధికారులు వెంటనే విచారణ జరిపి, నిబంధనలు ఉల్లంఘించినట్లు తేలితే చట్టపరమైన చర్యలు తీసుకోవాలని మండల ప్రజలు కోరుతున్నారు. అలాగే విధుల్లో నిర్లక్ష్యం వహించిన అధికారుల తీరుపైనా ఉన్నతాధికారులు పరిశీలన చేపట్టాలని వారు డిమాండ్ చేస్తున్నారు.