హైదరాబాద్: ప్రభుత్వ పాఠశాలల్లో చదువుతున్న విద్యార్థులకు బ్రేక్‌ఫాస్ట్ అందించే పథకం అమలుకు జున్నా సోలార్ సిస్టమ్స్, చైన్ ల్యాబ్స్ ఇండియా సంస్థలు హరేకృష్ణ ఫౌండేషన్‌తో ఒప్పందం చేసుకున్నాయి. ముఖ్యమంత్రి ఎ. రేవంత్ రెడ్డి సమక్షంలో ఈ ఒప్పందం జరిగింది. జూబ్లీహిల్స్‌లోని ముఖ్యమంత్రి నివాసంలో హరేకృష్ణ ఫౌండేషన్ ప్రతినిధులు, జున్నా సోలార్ సిస్టమ్స్, చైన్ ల్యాబ్స్ ఇండియా ప్రతినిధులు ముఖ్యమంత్రిని కలిశారు.
నాగర్‌కర్నూల్‌లో ఆధునిక సెంట్రలైజ్డ్ కమ్యూనిటీ కిచెన్ ఏర్పాటుకు జున్నా సోలార్ సిస్టమ్స్ సీఎండీ శేఖర్ రెడ్డి, సీఈఓ అనిల్ బాబుతో కలిసి రూ.5.17 కోట్ల చెక్కును హరేకృష్ణ ఫౌండేషన్‌కు అందించారు. వికారాబాద్‌లో సెంట్రలైజ్డ్ కమ్యూనిటీ కిచెన్ నిర్మాణానికి చైన్ ల్యాబ్స్ ఇండియా ప్రతినిధి డి.సుమంత్, వైస్ ప్రెసిడెంట్ బుగత సంతోష్ కుమార్ కలిసి రూ.4 కోట్ల చెక్కును అందించారు.
మంచి కార్యక్రమానికి నిధులు సమకూర్చేందుకు ముందుకు వచ్చిన సంస్థల ప్రతినిధులను సీఎం రేవంత్ రెడ్డి అభినందించారు. రాష్ట్రవ్యాప్తంగా డిసెంబర్ 9 నాటికి ఒకేసారి సెంట్రలైజ్డ్ కిచెన్లను ప్రారంభించేలా చర్యలు తీసుకోవాలని అధికారులను ఆదేశించారు. నవంబర్ 30లోగా కిచెన్ల ఏర్పాట్లు పూర్తిచేయాలని సూచించారు.
విద్యార్థులు సెంట్రల్ కిచెన్లను సందర్శించేలా చర్యలు తీసుకోవాలని, ప్రభుత్వ పాఠశాలల విద్యార్థుల శారీరక ఎదుగుదల, విద్యా పురోగతి వంటి అంశాలతో ట్రాక్ రికార్డును నిర్వహించాలని సీఎం సూచించారు. విద్యార్థులకు అందించే ఆహారంలోని కేలరీలను లెక్కించేందుకు యాప్‌లను వినియోగించాలని చెప్పారు.
బ్రేక్‌ఫాస్ట్ పథకం ద్వారా విద్యార్థులు సమయానికి పాఠశాలలకు చేరుకునే అవకాశం ఉంటుందని పేర్కొన్న సీఎం, ఆహార నాణ్యతపై నిరంతర పర్యవేక్షణ ఉండాలని ఆదేశించారు. ప్రాంతాల వారీగా స్థానిక ఆహారపు అలవాట్లకు అనుగుణంగా బ్రేక్‌ఫాస్ట్ అందించాలని, దీర్ఘకాలం కొనసాగించాల్సిన ఈ కార్యక్రమంలో భాగంగా సెంట్రల్ కిచెన్లను కమాండ్ కంట్రోల్ సెంటర్‌కు అనుసంధానం చేయాలని సూచించారు. కార్యక్రమంలో మంత్రి పొంగులేటి శ్రీనివాస్ రెడ్డి, రాజ్యసభ సభ్యుడు వేం నరేందర్ రెడ్డి, హరేకృష్ణ ప్రతినిధి సత్య గౌర చంద్ర దాస్ స్వామీజీతో పాటు ఇతర ప్రతినిధులు, ఉన్నతాధికారులు పాల్గొన్నారు.
కథనానికి సంబంధించిన ట్యాగ్‌లు (Tags):
