పాలెం–గుడ్లనర్వ మార్గంలో బ్రిడ్జి కింద భారీగా మందుల వ్యర్థాలు

ఆపద సమయంలో ప్రభుత్వ ఆసుపత్రికి వెళ్లినప్పుడు అవసరమైన మందులు అందుబాటులో లేక రోగులు ఇబ్బందులు పడుతున్న పరిస్థితుల్లో, ఇంత పెద్ద మొత్తంలో మందులు బహిరంగ ప్రదేశంలో పడివుండటంపై ప్రజలు ప్రశ్నలు లేవనెత్తుతున్నారు. ఈ మందులు ఎక్కడి నుంచి వచ్చాయి? ఎవరు ఇక్కడికి తీసుకొచ్చి పడేశారు? ఎందుకు ఇలా బహిరంగంగా పారవేశారు? వీటికి గడువు ముగిసిందా? లేక వినియోగించకుండా మిగిలిపోయిన ప్రభుత్వ సరఫరా మందులా? అనే విషయాలపై అధికారులు స్పష్టత ఇవ్వాల్సిన అవసరం ఉంది.

మందులను సాధారణ చెత్తతో కలిపి బహిరంగ ప్రదేశాల్లో పడేయడం వల్ల పర్యావరణంతో పాటు ప్రజలకు కూడా ఇబ్బందులు తలెత్తే అవకాశం ఉంది. అందువల్ల సంబంధిత వైద్య, ఆరోగ్యశాఖ అధికారులు వెంటనే స్పందించి బ్రిడ్జి కింద ఉన్న మందులను పరిశీలించి, వాటి మూలాలను గుర్తించి, బాధ్యులెవరైనా ఉంటే నిబంధనల ప్రకారం చర్యలు తీసుకోవాలని స్థానికులు కోరుతున్నారు.

ప్రభుత్వ మందులైతే వాటి సరఫరా, నిల్వ, వినియోగం, మిగులు మందుల వివరాలపై సమగ్ర విచారణ జరిపి వాస్తవాలను ప్రజలకు వెల్లడించాలని స్థానికులు డిమాండ్ చేస్తున్నారు.