తెలకపల్లి: మండలంలోని దాసుపల్లి గ్రామంలోని మండల పరిషత్ ప్రాథమిక పాఠశాలలో విద్యార్థుల సంఖ్య గణనీయంగా పెరిగినా, అందుకు అనుగుణంగా ఉపాధ్యాయులు, ఇతర సిబ్బంది లేకపోవడంతో ఇబ్బందులు ఎదురవుతున్నాయని గ్రామస్తులు, ఉపాధ్యాయులు తెలిపారు. గత ఏడాది కేవలం నలుగురు విద్యార్థులు ఉండగా, ప్రస్తుతం 18 మంది విద్యార్థులు చదువుతున్నారు. ఎంఈవో ఆదేశాల మేరకు ఉపాధ్యాయుడు చంద్రమౌళి బడిబాట కార్యక్రమాన్ని నిర్వహించడంతో విద్యార్థుల సంఖ్య పెరిగింది. దీంతో ఈ ఏడాది ఆగస్టులో ఉపాధ్యాయురాలు ఈశ్వరమ్మ విధుల్లో చేరారు.
ప్రస్తుతం 1వ తరగతిలో 8 మంది, 2వ తరగతిలో 2 మంది, 3వ తరగతిలో 5 మంది, 4వ తరగతిలో 3 మంది విద్యార్థులు ఉన్నారు. విద్యార్థుల సంఖ్యకు అనుగుణంగా ఉపాధ్యాయులు లేకపోవడంతో అన్ని సబ్జెక్టులను సమర్థవంతంగా బోధించడంలో ఇబ్బందులు ఎదురవుతున్నాయని తెలిపారు. అదేవిధంగా పీఈటీ, అటెండర్ లేకపోవడంతో విద్యార్థుల క్రీడా కార్యకలాపాలపై దృష్టి పెట్టడంతో పాటు పాఠశాల నిర్వహణలోనూ ఇబ్బందులు ఎదురవుతున్నాయని పేర్కొన్నారు.
విద్యార్థుల సంఖ్యను దృష్టిలో ఉంచుకుని అదనపు ఉపాధ్యాయులతో పాటు పీఈటీ, అటెండర్‌ను నియమించి పాఠశాలను బలోపేతం చేయాలని గ్రామస్తులు, ఉపాధ్యాయులు ప్రభుత్వాన్ని, విద్యాశాఖ అధికారులను కోరారు. అదనపు సిబ్బంది నియామకంతో విద్యార్థులకు మెరుగైన విద్యాబోధన అందే అవకాశం ఉంటుందని వారు తెలిపారు.
కథనానికి సంబంధించిన ట్యాగ్‌లు (Tags):