సర్పంచ్‌ను అవమానిస్తారా..? ఎమ్మెల్యే వంశీకృష్ణను నిలదీసిన ఆర్‌ఎస్ ప్రవీణ్ కుమార్

వంగూరు: వంగూరు మండలం జాజాల గ్రామ సర్పంచ్ జిలకర కాశమ్మను బీఆర్‌ఎస్ రాష్ట్ర ప్రధాన కార్యదర్శి డా. ఆర్‌ఎస్ ప్రవీణ్ కుమార్ పరామర్శించారు. ఈ సందర్భంగా సర్పంచ్ ఎదుర్కొంటున్న సమస్యలను అడిగి తెలుసుకున్న ఆయన, గ్రామ అభివృద్ధి పనులకు సంబంధించిన పెండింగ్ బిల్లుల అంశంపై ఎమ్మెల్యే వంశీకృష్ణను ప్రశ్నించారు.

“సర్పంచ్ బిల్లులు ఎందుకు ఆపుతున్నారు? ‘ఏం చేసుకుంటావో చేసుకోపో’ అంటూ మహిళా సర్పంచ్‌ను అవమానిస్తారా? సమస్యలను ప్రశ్నిస్తే సస్పెండ్ చేయిస్తారా?” అంటూ ప్రశ్నించారు. సీఎం రేవంత్ రెడ్డి సొంత మండలంలోనే మహిళా సర్పంచ్‌కు అవమానం జరగడం దారుణమని అన్నారు. సొంత మండలంలోనే పరిస్థితి ఇలా ఉంటే రాష్ట్రవ్యాప్తంగా ప్రజాప్రతినిధుల పరిస్థితి ఎలా ఉంటుందని ప్రశ్నించారు.

గ్రామ అభివృద్ధి పనులకు సంబంధించిన పెండింగ్ బిల్లులను వెంటనే విడుదల చేయాలని డిమాండ్ చేశారు. అలాగే దుందుభి వాగులో జరుగుతున్నట్లు పేర్కొన్న అక్రమ ఇసుక తవ్వకాలపై ప్రభుత్వం సమాధానం చెప్పాలని కోరారు. ప్రజా ప్రతినిధులను గౌరవించి, జాజాల గ్రామ సర్పంచ్ జిలకర కాశమ్మకు న్యాయం చేయాలని ఆర్‌ఎస్ ప్రవీణ్ కుమార్ డిమాండ్ చేశారు.