పాలెం కళాశాలలో యోగా.. మార్షల్ ఆర్ట్స్‌పై జాతీయ స్థాయి వర్క్‌షాప్

విద్యార్థుల్లో శారీరక, మానసిక ఆరోగ్యంతో పాటు క్రమశిక్షణ, ఆత్మవిశ్వాసం, ఏకాగ్రత, ఆత్మరక్షణ నైపుణ్యాలను పెంపొందించడం, యోగాను నిత్యజీవితంలో భాగంగా చేసుకునేలా అవగాహన కల్పించడం కార్యక్రమం ప్రధాన ఉద్దేశమని నిర్వాహకులు తెలిపారు.

కళాశాల ప్రిన్సిపాల్ డా. పి. రాములు అధ్యక్షత వహించి మాట్లాడుతూ.. విద్యార్థుల సమగ్ర వికాసానికి విద్యతో పాటు ఆరోగ్యం, మానసిక ప్రశాంతత, శారీరక దృఢత్వం, క్రమశిక్షణ ఎంతో అవసరమన్నారు. చదువుతో పాటు యోగా, వ్యాయామం, క్రీడలు, ఆత్మరక్షణ శిక్షణకు విద్యార్థులు సమయం కేటాయించాలని సూచించారు.

పతంజలి యోగా సమితి తెలంగాణ రాష్ట్ర అధ్యక్షుడు వాస్పరి శివుడు యోగా నిపుణుడిగా పాల్గొని వివిధ యోగా ఆసనాలు, శ్వాసాభ్యాసాలు, ధ్యాన పద్ధతులను ప్రత్యక్షంగా ప్రదర్శించారు. యోగా ద్వారా శారీరక ఆరోగ్యంతో పాటు మానసిక ప్రశాంతత, ఏకాగ్రత పెరుగుతాయని, ఒత్తిడిని నియంత్రించుకోవడంలో యోగా ఉపయోగకరమని వివరించారు.

అనంతరం మార్షల్ ఆర్ట్స్, శక్తి శిక్షణ నిపుణుడు, బ్లాక్ బెల్ట్ చిమ్మిరి అజయ్ విద్యార్థులకు ఆత్మరక్షణకు సంబంధించిన ప్రాథమిక పద్ధతులను ప్రత్యక్ష ప్రదర్శన ద్వారా వివరించారు. ప్రమాదకర పరిస్థితుల్లో ధైర్యంగా వ్యవహరించడం, స్వీయ రక్షణ, శారీరక దృఢత్వం, క్రమశిక్షణ వంటి అంశాలపై అవగాహన కల్పించారు.

ఈ వర్క్‌షాప్‌లో ఆన్‌లైన్ ద్వారా 60 మంది, ప్రత్యక్షంగా 282 మంది అధ్యాపకులు, విద్యార్థులు పాల్గొన్నారు. విద్యార్థులు యోగా, మార్షల్ ఆర్ట్స్ శిక్షణను ఆసక్తిగా స్వీకరించి నిపుణుల సూచనల మేరకు పలు అభ్యాసాల్లో పాల్గొన్నారు.

కార్యక్రమంలో కన్వీనర్ డా. వి. శ్రీనివాసులు, ఐక్యూఏసీ సమన్వయకర్త డా. కె. సుష్మా, ఆర్ట్స్ విభాగాల సమన్వయకర్తతో పాటు అధ్యాపకులు నాగలింగం, ప్రకాశ్ బాబు, డా. డి. పద్మజ, డా. సి. నాగరాజు, రాధాకుమారి తదితరులు పాల్గొన్నారు. అధ్యాపకులు కూడా విద్యార్థులతో కలిసి శిక్షణలో పాల్గొని ప్రోత్సహించారు.

యోగా ద్వారా ఆరోగ్యకరమైన శరీరం, ప్రశాంతమైన మనస్సు.. మార్షల్ ఆర్ట్స్ ద్వారా ఆత్మరక్షణ, ధైర్యం, క్రమశిక్షణ, ఆత్మవిశ్వాసం పెంపొందించుకోవచ్చనే సందేశాన్ని నిపుణులు అందించారు. కార్యక్రమం విజయవంతం కావడానికి సహకరించిన నిపుణులు, అధ్యాపకులు, విద్యార్థులు, పతంజలి సేవా సమితి ప్రతినిధులకు కళాశాల నిర్వాహకులు కృతజ్ఞతలు తెలిపారు.