తెలకపల్లి, సెప్టెంబర్ 17: మండల కేంద్రంలో గురువారం నిర్వహించిన ప్రజాపాలన దినోత్సవ కార్యక్రమాలు కొన్ని ప్రభుత్వ కార్యాలయాల్లో నామమాత్రంగా సాగినట్లు కనిపించాయి. జాతీయ ప్రాధాన్యత కలిగిన ఈ కార్యక్రమాన్ని ఘనంగా నిర్వహించాల్సి ఉండగా, కొన్ని చోట్ల ఆశించిన స్థాయిలో ఏర్పాట్లు, కార్యక్రమ నిర్వహణ కనిపించలేదని పలువురు పేర్కొన్నారు.
తహసీల్దార్ కార్యాలయం వద్ద జాతీయ జెండా ఏర్పాట్లను తహసీల్దార్ విజయ్ కుమార్ అటెండర్‌తో కలిసి స్వయంగా పర్యవేక్షించారు. జెండా ఆవిష్కరణకు ఏర్పాట్లు పూర్తయిన అనంతరం సిబ్బంది హాజరు కావడం గమనార్హంగా కనిపించింది.
మరోవైపు ఎంపీడీవో కార్యాలయం వద్ద ఉదయం 10 గంటలకు ఎంపీడీవో తరుణ్ జాతీయ జెండాను ఆవిష్కరించారు. అయితే జెండా ఆవిష్కరణ సమయంలో కొన్ని కార్యాలయాల్లో జాతీయ గీతాన్ని ఆలపించకపోవడం పలువురి దృష్టిని ఆకర్షించింది. జాతీయ గీతం ఆలాపన లేకపోవడంపై అక్కడున్న కొందరు అసంతృప్తి వ్యక్తం చేసినట్లు సమాచారం.
అదేవిధంగా ప్రజాపాలన దినోత్సవం ప్రాధాన్యతను వివరించేలా అధికారులు ఎవరూ ప్రసంగించకపోవడం కూడా పలువురిని ఆశ్చర్యానికి గురిచేసింది.
జాతీయ ప్రాధాన్యత కలిగిన కార్యక్రమాలను కేవలం కార్యక్రమం నిర్వహించామనే విధంగా కాకుండా, వాటి ప్రాధాన్యతను ప్రజలకు తెలియజేసేలా, తగిన గౌరవంతో నిర్వహించాలని పలువురు కోరుతున్నారు. ఇకముందైనా ప్రభుత్వ కార్యాలయాల్లో ఇటువంటి కార్యక్రమాలను సమన్వయంతో, ఉత్సాహభరిత వాతావరణంలో నిర్వహించాలని వారు సూచిస్తున్నారు.
కథనానికి సంబంధించిన ట్యాగ్‌లు (Tags):