తెలంగాణ గ్రాడ్యుయేట్ ఎమ్మెల్సీ ఎన్నికలకు ఓటర్ల జాబితా ప్రక్రియ షెడ్యూల్ విడుదల

ఎన్నికల సంఘం ప్రకటించిన షెడ్యూల్ ప్రకారం సెప్టెంబర్ 28, 2026న ఓటర్ల జాబితా ప్రక్రియపై ప్రజా నోటీసు విడుదల చేయనున్నారు. అక్టోబర్ 15న పత్రికల్లో తొలి పునఃప్రచురణ, అక్టోబర్ 25న రెండో పునఃప్రచురణ చేపట్టనున్నారు.

నవంబర్ 6న ఫారం–18 దరఖాస్తుల స్వీకరణకు చివరి తేదీగా నిర్ణయించారు. నవంబర్ 20న ముసాయిదా ఓటర్ల జాబితా ముద్రణ పూర్తి చేసి, నవంబర్ 25న ముసాయిదా జాబితాను ప్రచురించనున్నారు. నవంబర్ 25 నుంచి డిసెంబర్ 10 వరకు ఓటర్ల నుంచి క్లెయిమ్‌లు, అభ్యంతరాలను స్వీకరించనున్నారు. డిసెంబర్ 25న క్లెయిమ్‌లు, అభ్యంతరాల పరిష్కారం పూర్తి చేసి, డిసెంబర్ 30న తుది ఓటర్ల జాబితాను ప్రచురించనున్నారు.

ప్రస్తుత ఓటర్ల జాబితాలో పేర్లు ఉన్న గ్రాడ్యుయేట్లు కూడా ఈసారి కొత్తగా మార్చిన ఫారం–18లో దరఖాస్తు చేసుకోవాలని ఎన్నికల సంఘం స్పష్టం చేసింది. దరఖాస్తుతో పాటు అవసరమైన ధ్రువపత్రాలు, విద్యార్హతలకు సంబంధించిన సర్టిఫికెట్ల ధృవీకరించిన కాపీలను సమర్పించాలని సూచించింది.

ఎమ్మెల్సీ గ్రాడ్యుయేట్ నియోజకవర్గాల ఓటర్ల జాబితా ప్రక్రియలో అర్హులైన గ్రాడ్యుయేట్లు నిర్ణీత గడువులోగా ఫారం–18 ద్వారా దరఖాస్తు చేసుకోవాలని అధికారులు సూచించారు.