ఠాణాలో కొలువుదీరిన గణనాథుడు

బిజినపల్లి మండల కేంద్రంలోని పోలీస్‌స్టేషన్‌లో గణనాథుడు కొలువుదీరాడు. సుమారు 17 సంవత్సరాల తర్వాత పోలీస్‌స్టేషన్ ఆవరణలో వినాయక విగ్రహాన్ని ప్రతిష్ఠించి ప్రత్యేక పూజలు నిర్వహించారు. ఎస్‌ఐ షంషోద్దీన్ స్వయంగా వినాయకుడికి పూజలు నిర్వహించడం ప్రత్యేక ఆకర్షణగా నిలిచింది.

ముస్లిం మతానికి చెందిన ఎస్‌ఐ షంషోద్దీన్ వినాయకుడికి ప్రత్యేక పూజలు చేయడాన్ని వివిధ గ్రామాల నుంచి పోలీస్‌స్టేషన్‌కు వచ్చిన ప్రజలు అభినందించారు. మత సామరస్యానికి, సోదరభావానికి ఇది ప్రతీకగా నిలుస్తుందని పలువురు పేర్కొన్నారు.

ఈ సందర్భంగా ఎస్‌ఐ షంషోద్దీన్ మాట్లాడుతూ.. గ్రామాల్లో ప్రజలంతా పండుగలను ప్రశాంత వాతావరణంలో జరుపుకోవాలని, అన్ని మతాలకు చెందిన వారు పరస్పరం సోదరభావంతో కలిసి మెలిసి పండుగలను ఆనందంగా నిర్వహించుకోవాలని కోరారు.

పోలీస్‌స్టేషన్‌లో నిర్వహించిన ప్రత్యేక పూజల్లో ఏఎస్సై కృష్ణయ్య, హెడ్ కానిస్టేబుళ్లు సతీష్, శేఖర్‌గౌడ్, నారాయణ, జితేందర్ నాయక్, అంకిత, శివకుమార్, రమేష్, రాము తదితర పోలీసు సిబ్బందితో పాటు నాయకులు తిరుపతయ్య, మిద్దె రాము, గోవిందు నాయక్, వాల్యానాయక్ తదితరులు పాల్గొన్నారు.