భార్యతో అక్రమ సంబంధం.. భర్త దారుణ హత్య!

పోలీసుల వివరాల ప్రకారం.. కరీం భార్య సలీమా బేగం, గౌస్ పాషా మధ్య సుమారు రెండేళ్లుగా అక్రమ సంబంధం కొనసాగుతోంది. ఈ విషయం తెలిసిన కరీం భార్యను మందలించడంతో తరచూ భార్యాభర్తల మధ్య గొడవలు జరిగేవి. సుమారు రెండు నెలల క్రితం జరిగిన పంచాయితీలో పెద్దలు గౌస్ పాషాను కూడా మందలించారు. ఆ సమయంలో కరీంను చంపేస్తానని గౌస్ పాషా బెదిరించినట్లు పోలీసులు తెలిపారు.

కరీంను హత్య చేయాలనే ఉద్దేశంతో గౌస్ పాషా రోడ్డు పక్కన కత్తిని కొనుగోలు చేసి ఇంట్లో దాచుకున్నాడు. అనంతరం వాట్సప్ కాల్స్ ద్వారా కరీం హత్యకు సంబంధించి కుట్ర పన్నినట్లు పోలీసులు వెల్లడించారు. ఆస్తి సలీమా పేరుపై ఉండటంతో భర్తను అడ్డు తొలగించుకోవాలని ఇద్దరూ పథకం వేసినట్లు తెలిపారు.

సలీమా బేగం నెల్లూరు దర్గాకు వెళ్లిన సమయంలో హత్యకు పథకం అమలు చేసినట్లు పోలీసులు పేర్కొన్నారు. గౌస్ పాషా కరీం ఇంటికి వెళ్లి డోర్‌బెల్ కొట్టాడు. నిద్రమత్తులో ఉన్న కరీం తలుపు తీయగానే కత్తితో దాడి చేసి గొంతు కోసి హత్య చేసినట్లు విచారణలో వెల్లడైంది. అనంతరం అక్కడి నుంచి పరారైన గౌస్ పాషా మార్గమధ్యంలో కత్తి, చెప్పులు, బట్టలు, గ్లాసులను పడేసినట్లు పోలీసులు తెలిపారు.

కరీం హత్య అనంతరం సలీమా బేగంను అదుపులోకి తీసుకుని పోలీసులు విచారించగా హత్య కుట్రకు సంబంధించిన వివరాలు వెలుగులోకి వచ్చాయి. సలీమా ఇచ్చిన వాంగ్మూలం ఆధారంగా గౌస్ పాషాను పోలీసులు అదుపులోకి తీసుకున్నారు. పోలీసుల విచారణలో కరీంను తానే హత్య చేసినట్లు గౌస్ పాషా అంగీకరించినట్లు తెలిపారు.

ఈ కేసుకు సంబంధించిన వివరాలను డీఎస్పీ బుర్రి శ్రీనివాసులు మీడియాకు వెల్లడించారు. కేసును ఛేదించడంలో కీలకంగా వ్యవహరించిన సీఐ అశోక్ రెడ్డి, ఎస్‌ఐ వెంకట్ రెడ్డితో పాటు ఐడీ పార్టీ సిబ్బంది వెంకటేష్, భీముడు, రమేష్‌లను డీఎస్పీ అభినందించారు.