వివి కండ్రిక భూ కబ్జాలపై చర్యలు తీసుకోవాలిఆర్డీఓకు సీఐటీయూ, కేవీపీఎస్ నాయకుల ఫిర్యాదు

రైల్వేకోడూరు, సెప్టెంబర్ 9: తిరుపతి జిల్లా రైల్వేకోడూరు మండలం వివి కండ్రిక గ్రామంలోని ప్రభుత్వ భూముల ఆక్రమణలపై తక్షణ చర్యలు తీసుకోవాలని సీఐటీయూ రాష్ట్ర కౌన్సిల్ నాయకులు సీహెచ్ చంద్రశేఖర్ డిమాండ్ చేశారు. ఈ మేరకు మంగళవారం కోడూరు ఎమ్మార్వో కార్యాలయానికి వచ్చిన ఆర్డీఓ రామ్మోహన్‌కు సీఐటీయూ, కేవీపీఎస్ నాయకులు ఫిర్యాదు చేశారు. గ్రామంలోని సర్వే నంబర్ 130లో సుమారు 300 ఎకరాల ప్రభుత్వ భూమిని కొందరు ఆక్రమించేందుకు రాత్రింబవళ్లు జేసీబీ యంత్రాలతో పనులు చేస్తున్నారని ఫిర్యాదులో పేర్కొన్నారు. ప్రభుత్వ మిగులు, ప్రభుత్వ భూములను ముందుగా దళితులకు కేటాయించాలని, కోనేరు రంగారావు కమిటీ, జస్టిస్ పున్నయ్య కమిటీ సిఫార్సులను అమలు చేయాలని వారు కోరారు. గత రెండు నెలలుగా భూ ఆక్రమణలపై స్థానిక ఎమ్మార్వో, వీఆర్వోలకు ఫిర్యాదు చేసినప్పటికీ పట్టించుకోలేదని ఆరోపించారు. ఈ సమస్యపై ఎమ్మార్వో కార్యాలయం, కలెక్టర్ కార్యాలయం వద్ద దళితులు ధర్నాలు చేసిన విషయాన్ని గుర్తు చేశారు. ఫిర్యాదుపై స్పందించిన ఆర్డీఓ రామ్మోహన్ భూ ఆక్రమణలను తక్షణమే అరికట్టాలని, నాటిన చెట్లను తొలగించాలని, భూ గ్యాంబ్లింగ్‌కు పాల్పడుతున్న వారిపై బైండోవర్ కేసులు నమోదు చేయాలని ఎమ్మార్వోను ఆదేశించినట్లు నాయకులు తెలిపారు. రెండు రోజుల్లోగా భూ ఆక్రమణలను అరికట్టకపోతే దళితులు, గిరిజనులతో కలిసి ప్రత్యక్ష ఆందోళన చేపడతామని, తద్వారా జరిగే పరిణామాలకు రెవెన్యూ అధికారులే బాధ్యత వహించాల్సి ఉంటుందని హెచ్చరించారు. కార్యక్రమంలో వ్యవసాయ కార్మిక సంఘం మండల నాయకులు బొజ్జ శివయ్య, కేవీపీఎస్ నాయకులు అనిల్ తదితరులు పాల్గొన్నారు.