మెడలో బంగారు ఆభరణాల కోసమే వృద్ధ మహిళ హత్య?

తిరుపతి జిల్లా రైల్వేకోడూరు పట్టణంలోని వినాయకనగర్‌లో రాజుపాలెం మంగమ్మ (70) అనే వృద్ధ మహిళ హత్యకు గురైన ఘటనపై పోలీసులు ముమ్మర దర్యాప్తు చేపట్టారు. ఈ ఘటనపై సెప్టెంబర్ 8న కేసు నమోదు చేసి, నిందితులను గుర్తించేందుకు ప్రత్యేక బృందాలను రంగంలోకి దించారు.

మంగమ్మ ఒంటరిగా నివసిస్తున్నట్లు పోలీసులు ప్రాథమికంగా గుర్తించారు. సెప్టెంబర్ 7 రాత్రి సుమారు 8 గంటల సమయంలో ఆమెను చివరిసారిగా చూసినట్లు ఫిర్యాదులో పేర్కొన్నారు. కాగా, మృతురాలి వద్ద ఉండాల్సిన సుమారు 4 తులాల బంగారు ఆభరణాలు కనిపించకపోవడంతో.. ఆభరణాల కోసమే హత్య జరిగి ఉండవచ్చనే కోణంలో పోలీసులు దర్యాప్తు చేస్తున్నారు. చెవి దిద్దులు, ఉంగరం, చంద్రముఖి మోడల్ గొలుసు కనిపించకుండా పోయినట్లు గుర్తించారు.

కేసును ఛేదించేందుకు పోలీసులు డాగ్ స్క్వాడ్, ఫోరెన్సిక్, ఫింగర్‌ప్రింట్స్, డ్రోన్ సర్వైలెన్స్ బృందాలను రంగంలోకి దించారు. ఘటనాస్థలంతో పాటు పరిసర ప్రాంతాల్లో శాస్త్రీయ ఆధారాలను సేకరిస్తున్నారు. సమీప ప్రాంతాల్లోని సీసీటీవీ కెమెరాల ఫుటేజ్‌ను పరిశీలించడంతో పాటు సాంకేతిక ఆధారాలను విశ్లేషిస్తున్నారు. అనుమానితులు, స్థానికులను కూడా విచారిస్తున్నారు.

నిందితులను త్వరితగతిన గుర్తించి అరెస్టు చేయడంతో పాటు చోరీకి గురైన బంగారు ఆభరణాలను స్వాధీనం చేసుకునేందుకు రెండు ప్రత్యేక పోలీసు బృందాలను ఏర్పాటు చేశారు. ఈ బృందాల్లో కోడూరు టౌన్ సీఐ, కోడూరు రూరల్ సీఐ, చిట్వేల్ ఎస్‌ఐ, కోడూరు ఎస్‌ఐతో పాటు సిబ్బంది పాల్గొని సమన్వయంతో దర్యాప్తు చేస్తున్నారు.

రేణిగుంట డీఎస్పీ వై. శ్రీనివాసరావు పర్యవేక్షణలో ప్రత్యేక బృందాలు అన్ని కోణాల్లో దర్యాప్తు కొనసాగిస్తున్నాయి. సాంకేతిక, శాస్త్రీయ ఆధారాలను సమగ్రంగా విశ్లేషించి నేరానికి పాల్పడిన వారిని గుర్తించి చట్టపరమైన చర్యలు తీసుకునేందుకు పోలీసులు చర్యలు చేపట్టారు.

కేసును తక్కువ సమయంలోనే ఛేదించి నిందితులను అరెస్టు చేయడంతో పాటు చోరీకి గురైన బంగారు ఆభరణాలను స్వాధీనం చేసుకునే దిశగా దర్యాప్తు ముమ్మరంగా కొనసాగుతోంది.