కొన్నూరు మాజీ సర్పంచ్ అంజన్న యాదవ్‌కు ఘన నివాళులు

మదనపురం: వనపర్తి జిల్లా మదనపురం మండల పరిధిలోని కొన్నూరు గ్రామ మాజీ సర్పంచ్ అంజన్న యాదవ్ మృతదేహానికి అఖిలపక్ష ఐక్యవేదిక జిల్లా అధ్యక్షుడు సతీష్ యాదవ్ ఘన నివాళులు అర్పించారు. కొత్తకోట పట్టణంలోని రాహుల్ హాస్పిటల్‌లో అనారోగ్యంతో చికిత్స పొందుతున్న అంజన్న యాదవ్ ఆదివారం ఉదయం గుండెపోటుతో మృతి చెందారు.

విషయం తెలుసుకున్న అఖిలపక్ష ఐక్యవేదిక జిల్లా అధ్యక్షుడు సతీష్ యాదవ్, న్యాయవాది కే. రాములు యాదవ్, సీనియర్ జర్నలిస్ట్ నాకొండ యాదవ్, కాంగ్రెస్ సీనియర్ నాయకుడు ముంత లక్ష్మయ్య యాదవ్, టీఆర్‌ఎస్ నాయకుడు, మాజీ ఎంపీటీసీ సత్యం యాదవ్, ఆశన్న యాదవ్, పాలెం మాజీ ఉప సర్పంచ్ జయరాములు తదితరులు కొన్నూరుకు చేరుకుని అంజన్న యాదవ్ భౌతికకాయాన్ని సందర్శించారు. పూలమాలలు వేసి నివాళులు అర్పించి, కుటుంబ సభ్యులకు ప్రగాఢ సానుభూతి తెలిపారు.

అంజన్న యాదవ్ టీడీపీ సీనియర్ నాయకుడిగా, రావుల చంద్రశేఖర్ రెడ్డికి నమ్మకస్తుడిగా ఉంటూ గ్రామ సర్పంచ్‌గా ఎన్నికై ప్రజలకు విశేష సేవలు అందించారని సతీష్ యాదవ్ పేర్కొన్నారు. గ్రామ అభివృద్ధి కోసం ఆయన చేసిన కృషి, ప్రజలకు అందించిన సేవలు ఎప్పటికీ మరువలేనివని అన్నారు.

కుటుంబానికి ప్రగాఢ సానుభూతి

అంజన్న యాదవ్ మృతి గ్రామానికి, ఆయనను అభిమానించే వారికి తీరని లోటని సతీష్ యాదవ్ అన్నారు. ఆయన ఆత్మకు శాంతి చేకూరాలని ప్రార్థిస్తూ, కుటుంబ సభ్యులకు ధైర్యం కలగాలని ఆకాంక్షించారు.