కరెంట్ కష్టాలపై రైతుల గర్జన.. సబ్‌స్టేషన్ ముట్టడి

నాగర్‌కర్నూల్ జిల్లా కేంద్రంలో విద్యుత్ సమస్యలపై రైతులు భారీ స్థాయిలో ఆందోళన చేపట్టారు. బీఆర్‌ఎస్ పార్టీ పిలుపు మేరకు మాజీ ఎమ్మెల్యే మర్రి జనార్దన్ రెడ్డి అధ్యక్షతన నిర్వహించిన ఈ కార్యక్రమానికి జిల్లాలోని వివిధ మండలాలు, గ్రామాల నుంచి పెద్ద సంఖ్యలో రైతులు తరలివచ్చారు. విద్యుత్ సరఫరాలో ఎదురవుతున్న ఇబ్బందులపై రైతులు తమ గళాన్ని వినిపించారు.

నాగర్‌కర్నూల్‌లోని వేలమా ఫంక్షన్ హాల్ నుంచి హౌసింగ్ బోర్డు విద్యుత్ డిస్ట్రిక్ట్ కార్యాలయం వరకు రైతులు ట్రాక్టర్లతో భారీ ర్యాలీ నిర్వహించారు. అనంతరం విద్యుత్ అధికారులను కలిసి రైతులు తమ సమస్యలను వివరించారు. పంటలు సాగు చేస్తున్న సమయంలో విద్యుత్ సరఫరాలో అంతరాయాలు ఏర్పడటంతో రైతులు తీవ్ర ఇబ్బందులు పడుతున్నారని తెలిపారు.

రైతులకు నాణ్యమైన విద్యుత్ అందించాలి

పంట పొలాలకు అవసరమైన సమయంలో నిరంతరాయంగా విద్యుత్ సరఫరా చేయాలని రైతులు అధికారులను కోరారు. విద్యుత్ కోతలు, సరఫరాలో అంతరాయాల కారణంగా పంటలు దెబ్బతినే పరిస్థితి ఏర్పడుతోందని ఆవేదన వ్యక్తం చేశారు. రైతుల సమస్యలను తక్షణమే పరిష్కరించి వ్యవసాయానికి నాణ్యమైన విద్యుత్ అందించాలని డిమాండ్ చేశారు.

ఈ కార్యక్రమానికి ముఖ్య అతిథిగా తెలంగాణ రాష్ట్ర మాజీ వ్యవసాయ శాఖ మంత్రి సింగిరెడ్డి నిరంజన్‌రెడ్డి పాల్గొన్నారు. రైతుల సమస్యలను అడిగి తెలుసుకుని వారికి అండగా నిలిచారు. మాజీ ఎమ్మెల్యే మర్రి జనార్దన్‌రెడ్డి అధ్యక్షతన జరిగిన ఈ ఆందోళనలో వివిధ గ్రామాల నుంచి రైతులు పెద్ద సంఖ్యలో పాల్గొన్నారు.