నాగర్‌కర్నూల్ జిల్లా, తాడూర్:
నిరుపేద గిరిజన విద్యార్థినుల ఉన్నత విద్యకు అండగా నిలుస్తూ మాజీ ఎమ్మెల్యే మర్రి జనార్దన్ రెడ్డి మరోసారి తన మానవతా దృక్పథాన్ని చాటుకున్నారు. తాడూర్ మండలంలోని పర్వతాయిపల్లి తండాకు చెందిన ముడావత్ సత్యం కుమార్తె ముడావత్ అనూష ఇంజనీరింగ్ విద్యను అభ్యసిస్తుండగా, ఆమె హాస్టల్ ఫీజు చెల్లించేందుకు ఆర్థిక ఇబ్బందులు ఎదుర్కొంటున్న విషయం మాజీ ఎమ్మెల్యే దృష్టికి వెళ్లింది.
విషయం తెలుసుకున్న మర్రి జనార్దన్ రెడ్డి వెంటనే స్పందించి, తన MJR ట్రస్ట్ ద్వారా విద్యార్థినికి ఆర్థిక సహాయం అందించేందుకు ముందుకు వచ్చారు. గత సంవత్సరం 2025 ఆగస్టు 22న మొదటి సంవత్సరం హాస్టల్ ఫీజు కోసం రూ.50,000 ఆర్థిక సహాయం అందించారు. తాజాగా రెండో సంవత్సరం హాస్టల్ ఫీజు కోసం మరో రూ.50,000 విలువైన చెక్కును విద్యార్థిని అనూషకు అందజేశారు.
అనూష హైదరాబాద్‌లోని శ్రీ హిందూ ఇంజనీరింగ్ కాలేజీలో ఉచిత సీటు సాధించి ఇంజనీరింగ్ విద్యను కొనసాగిస్తోంది. అయితే కుటుంబ ఆర్థిక పరిస్థితుల కారణంగా హాస్టల్ ఫీజు చెల్లించడం ఇబ్బందిగా మారడంతో ఈ సహాయం ఆమెకు ఎంతో తోడ్పాటుగా నిలిచింది.
ఈ సందర్భంగా మాజీ ఎమ్మెల్యే మర్రి జనార్దన్ రెడ్డి మాట్లాడుతూ.. “పేదరికం ఏ బిడ్డ భవిష్యత్తుకు అడ్డంకి కాకూడదు. ముఖ్యంగా గిరిజన బిడ్డలు ఉన్నత చదువులు చదివి జీవితంలో ఎదగాలి. ప్రతిభ ఉన్న విద్యార్థులకు ఆర్థిక పరిస్థితులు అడ్డంకిగా మారకుండా వారికి సాధ్యమైనంత వరకు అండగా నిలవడం మన బాధ్యత” అని అన్నారు.
విద్యార్థిని అనూషకు వరుసగా రెండో ఏడాది కూడా ఆర్థిక సహాయం అందించడంపై కుటుంబ సభ్యులు మాజీ ఎమ్మెల్యే మర్రి జనార్దన్ రెడ్డికి కృతజ్ఞతలు తెలిపారు. ఈ కార్యక్రమంలో పలువురు పార్టీ నాయకులు, కార్యకర్తలు పాల్గొన్నారు.
కథనానికి సంబంధించిన ట్యాగ్‌లు (Tags):
