ఘనంగా తెలుగు ఉపాధ్యాయురాలు అరుణకు పదవీ విరమణ వీడ్కోలు

కడుకుంట్ల అరుణ 1986లో ఉపాధ్యాయ వృత్తిలో అడుగుపెట్టి సుమారు 40 సంవత్సరాల 6 నెలల 13 రోజుల పాటు విద్యార్థులకు విద్యాబోధన చేశారు. తన సుదీర్ఘ ఉద్యోగ ప్రస్థానంలో సుమారు 10 పాఠశాలల్లో విధులు నిర్వహిస్తూ తెలుగు పండితురాలిగా ప్రత్యేక గుర్తింపును సంపాదించుకున్నారు. తెలుగు భాష, సాహిత్యంపై విద్యార్థుల్లో ఆసక్తిని పెంపొందించేందుకు ఆమె చేసిన కృషిని పలువురు గుర్తు చేసుకున్నారు.

తన సేవా కాలంలో ఎంతోమంది విద్యార్థులకు తెలుగు బోధిస్తూ వారి విద్యాభివృద్ధికి తోడ్పడ్డారని ఉపాధ్యాయులు తెలిపారు. క్రమశిక్షణ, బాధ్యత, అంకితభావంతో విధులు నిర్వహిస్తూ సహచర ఉపాధ్యాయులతో స్నేహపూర్వకంగా మెలిగారని పేర్కొన్నారు.

చివరగా నాగర్‌కర్నూల్ జిల్లా పరిషత్ ఉన్నత పాఠశాలలో విధులు నిర్వహించి పదవీ విరమణ పొందిన అరుణ మేడంకు పాఠశాల జీహెచ్‌ఎం లతా మేడం, ఉపాధ్యాయ బృందం, విద్యార్థినీ విద్యార్థులు ఘనంగా వీడ్కోలు పలికారు. ఈ సందర్భంగా అరుణ మేడంను శాలువాతో సత్కరించి, ఆమె భవిష్యత్ జీవితం ఆనందంగా, ఆరోగ్యంగా సాగాలని ఆకాంక్షించారు.

ఈ కార్యక్రమంలో ఉపాధ్యాయులు, విద్యార్థులు పాల్గొని అరుణ మేడంతో తమ అనుబంధాన్ని గుర్తు చేసుకున్నారు. సుదీర్ఘకాలం విద్యారంగానికి సేవలందించిన ఆమెకు ఘనంగా వీడ్కోలు పలుకుతూ పాఠశాల కుటుంబ సభ్యులు కృతజ్ఞతలు తెలిపారు.