షాద్‌నగర్‌లో ఘనంగా ‘ఖేలో ఇండియా సంవాద్’ కార్యక్రమం

కార్యక్రమంలో ప్రముఖ బ్యాడ్మింటన్ క్రీడాకారిణి పీవీ సింధు, బ్యాడ్మింటన్ క్రీడాకారిణి ముస్కాన్ ఖాన్ విశిష్ట అతిథులుగా పాల్గొన్నారు. ఈ సందర్భంగా ప్రధానమంత్రి నరేంద్ర మోదీ క్రీడాకారులు, యువతను ఉద్దేశించి వర్చువల్‌గా ప్రసంగించారు.

ఈ సందర్భంగా ఎంపీ డీకే అరుణ మాట్లాడుతూ.. జాతీయ క్రీడా దినోత్సవం సందర్భంగా నిర్వహించిన ‘ఖేలో ఇండియా సంవాద్ – ఖేల్ కీ బాత్ పీఎం కే సాత్’ కార్యక్రమంలో పాల్గొనడం ఎంతో సంతోషంగా ఉందన్నారు. గ్రామీణ స్థాయిలో యువతలో దాగి ఉన్న క్రీడా ప్రతిభను గుర్తించి, వారిని ప్రోత్సహించేందుకు ‘ఖేలో ఇండియా’ ఒక అద్భుతమైన కార్యక్రమమని పేర్కొన్నారు.

యువత క్రీడా రంగంలో రాణించడం ద్వారా అనేక అవకాశాలను అందిపుచ్చుకోవచ్చని తెలిపారు. కేంద్రంలో నరేంద్ర మోదీ ప్రభుత్వం ఏర్పడినప్పటి నుంచి దేశంలో క్రీడలకు ప్రత్యేక ప్రాధాన్యత కల్పిస్తూ, క్రీడాకారులను ప్రోత్సహించేందుకు అనేక కార్యక్రమాలను అమలు చేస్తోందని వివరించారు.

ప్రధానమంత్రి నరేంద్ర మోదీ నాయకత్వంలో బీజేపీ ఎంపీలు ప్రాతినిధ్యం వహిస్తున్న పార్లమెంట్ నియోజకవర్గాల్లో ‘ప్రధానమంత్రి సంసద్ ఖేల్ మహోత్సవ్’ నిర్వహిస్తున్నట్లు డీకే అరుణ తెలిపారు.

ఇందులో భాగంగా ఇటీవల మహబూబ్‌నగర్ పార్లమెంట్ నియోజకవర్గ పరిధిలోని ఏడు అసెంబ్లీ నియోజకవర్గాల్లో ‘సంసద్ ఖేల్ మహోత్సవ్’ను విజయవంతంగా నిర్వహించినట్లు చెప్పారు. ఈ పోటీల్లో గ్రామీణ ప్రాంతాల్లో విస్తృతంగా ఆదరణ ఉన్న కబడ్డీ, ఖో-ఖో, వాలీబాల్, క్రికెట్, అథ్లెటిక్స్ వంటి క్రీడలకు ప్రాధాన్యత ఇచ్చినట్లు తెలిపారు.

క్రీడా రంగంలో ప్రతిభ కనబరిచే క్రీడాకారులకు తగిన ప్రోత్సాహం, అవకాశాలు అందించేందుకు కేంద్ర ప్రభుత్వం కృషి చేస్తోందని ఎంపీ డీకే అరుణ అన్నారు. గ్రామీణ ప్రాంతాల నుంచి ప్రతిభావంతులైన క్రీడాకారులను గుర్తించి, వారికి సరైన శిక్షణ, ప్రోత్సాహం అందిస్తే జాతీయ, అంతర్జాతీయ స్థాయిలో రాణించే అవకాశం ఉంటుందని పేర్కొన్నారు.

మహబూబ్‌నగర్ పార్లమెంట్ నియోజకవర్గానికి చెందిన క్రీడాకారులు ఉన్నత స్థాయికి చేరుకునేలా తీర్చిదిద్దేందుకు తాను ఎల్లప్పుడూ అండగా ఉంటానని ఎంపీ డీకే అరుణ హామీ ఇచ్చారు. యువత క్రీడలను కెరీర్‌గా ఎంచుకుని దేశానికి, రాష్ట్రానికి పేరు తీసుకురావాలని ఆకాంక్షించారు.

ఈ కార్యక్రమంలో బీజేపీ నాయకులు పవన్ కుమార్ రెడ్డి, అందే బాబయ్య, పాలమూరు విష్ణువర్ధన్ రెడ్డి, ముచ్చర్లపల్లి జనార్దన్ రెడ్డి, కార్పొరేటర్ కిరణ్ కుమార్ రెడ్డి, నవీన్ రెడ్డి, మహేందర్ రెడ్డి, వంశీకృష్ణ తదితర ముఖ్య నాయకులు, కార్యకర్తలు, క్రీడాకారులు, విద్యార్థులు పాల్గొన్నారు.