నాగర్‌కర్నూల్: జిల్లాలో రైతులకు విద్యుత్ కష్టాలు తప్పడం లేదని రైతులు ఆవేదన వ్యక్తం చేస్తున్నారు. వ్యవసాయానికి రోజుకు 13 గంటల విద్యుత్ సరఫరా చేస్తున్నామని అధికారులు చెబుతున్నప్పటికీ.. క్షేత్రస్థాయిలో పది గంటలు కూడా కరెంట్ రావడం లేదని రైతులు ఆరోపిస్తున్నారు.
ఒకవైపు కల్వకుర్తి ఎత్తిపోతల పథకం నుంచి సాగునీటి విడుదల ఆలస్యం కావడంతో పలువురు రైతులు బోర్‌వెల్స్‌పై ఆధారపడి సాగు పనులు కొనసాగిస్తున్నారు. మరోవైపు బోర్లు నడిపేందుకు అవసరమైన విద్యుత్ సక్రమంగా అందకపోవడంతో రైతుల కష్టాలు రెట్టింపవుతున్నాయని వాపోతున్నారు.
ప్రతి గ్రామంలో.. మూడు గంటల కోత?
ఎల్‌సీ (లైన్ క్లియర్) పేరుతో దాదాపు మూడు గంటల పాటు విద్యుత్ సరఫరా నిలిపివేస్తున్నారని రైతులు ఆరోపిస్తున్నారు. ఎల్‌సీ పేరుతో కోత విధించిన తర్వాత కూడా విద్యుత్ సరఫరా పునరుద్ధరణలో జాప్యం జరుగుతోందని చెబుతున్నారు.
కరెంట్ ఎప్పుడు వస్తుందో.. ఎప్పుడు పోతుందో తెలియని పరిస్థితి నెలకొనడంతో వ్యవసాయ మోటార్లు నడపలేకపోతున్నామని రైతులు ఆవేదన వ్యక్తం చేస్తున్నారు. పంటలకు నీరు పెట్టేందుకు రాత్రింబవళ్లు విద్యుత్ కోసం ఎదురుచూడాల్సి వస్తోందని అంటున్నారు.
అధికారులను అడిగితే.. సాకులే!
విద్యుత్ సరఫరాపై అధికారులను ప్రశ్నిస్తే.. “ఎల్‌సీ ఉంది.. లైన్ పని జరుగుతోంది.. సాంకేతిక సమస్య” అంటూ వివిధ కారణాలు చెబుతున్నారని రైతులు పేర్కొంటున్నారు.
అధికారులు చెబుతున్న 13 గంటల సరఫరాకు, గ్రామాల్లో వాస్తవంగా అందుతున్న విద్యుత్ సరఫరాకు పొంతన లేదని రైతులు స్పష్టం చేస్తున్నారు.
నీళ్లు లేవు.. కరెంట్ లేదు!
సకాలంలో వర్షాలు లేకపోవడం, కల్వకుర్తి ఎత్తిపోతల పథకం నీటి విడుదల ఆలస్యం కావడం, బోర్లపై ఆధారపడాల్సిన పరిస్థితి రావడం.. చివరకు బోర్లు నడిపేందుకు విద్యుత్ కూడా సక్రమంగా అందకపోవడంతో అన్నదాతల పరిస్థితి దయనీయంగా మారిందని రైతులు ఆవేదన వ్యక్తం చేస్తున్నారు.
“13 గంటల కరెంట్ అంటున్నారు.. మా ఊర్లో పది గంటలు కూడా రావడం లేదు. మూడు గంటలు ఎల్‌సీ పేరుతో కట్ చేస్తున్నారు. రైతుల కష్టం అధికారులకు కనిపించడం లేదా?” అంటూ రైతులు ప్రశ్నిస్తున్నారు.
వ్యవసాయానికి ప్రకటించిన మేరకు విద్యుత్ సరఫరా చేయాలని, ఎల్‌సీ పేరుతో జరుగుతున్న కోతలను తగ్గించాలని, విద్యుత్ సరఫరాపై స్పష్టమైన షెడ్యూల్ ప్రకటించాలని రైతులు డిమాండ్ చేస్తున్నారు.
కథనానికి సంబంధించిన ట్యాగ్‌లు (Tags):