తెలకపల్లి, ఆగస్టు 20: ఓటరు జాబితా ప్రత్యేక సవరణ ప్రక్రియలో అర్హులైన ప్రతి ఒక్కరి వివరాలను సక్రమంగా నమోదు చేయడంతో పాటు, జాబితాలో ఎలాంటి తప్పులు లేకుండా జాగ్రత్తలు తీసుకోవాలని తహసీల్దార్‌ విజయకుమార్‌ బీఎల్‌వోలకు సూచించారు. ఈ మేరకు బీఎల్‌వోలతో నిర్వహించిన సమావేశంలో ఆయన పలు సూచనలు చేశారు.
ఈ సందర్భంగా తహసీల్దార్‌ మాట్లాడుతూ.. నేటి నుంచి ఇంటింటికీ నోటీసుల పంపిణీ ప్రక్రియ చేపట్టనున్నట్లు తెలిపారు. ఆన్‌లైన్‌లో నమోదైన ఓటరు వివరాలను పరిశీలించి, అర్హత కలిగిన ఓటర్ల వివరాలు సక్రమంగా ఉండేలా చూడాలని సూచించారు. పేర్లు, ఇతర వివరాల్లో మార్పులు, చేర్పులు చేసే సమయంలో నిబంధనల ప్రకారం అవసరమైన ఆధారాలను పూర్తిగా పరిశీలించాలని బీఎల్‌వోలకు అవగాహన కల్పించారు.
ఓటర్లకు ఏవైనా సమస్యలు, అభ్యంతరాలు లేదా వివరాల్లో తప్పులు ఉన్నట్లయితే వెంటనే సంబంధిత బీఎల్‌వోలకు తెలియజేయాలని అధికారులు సూచించారు. ప్రజలు తమ ఓటరు వివరాలను స్వయంగా పరిశీలించుకుని, అవసరమైన సవరణలు ఉంటే నిర్ణీత ప్రక్రియ ద్వారా దరఖాస్తు చేసుకోవాలని తెలిపారు.
ఈ నెల 30న గ్రామసభలు
ఓటరు జాబితా సవరణకు సంబంధించి ప్రజల సమస్యలు, అభ్యంతరాల పరిష్కారానికి ఈ నెల 30న అన్ని గ్రామపంచాయతీల్లో గ్రామసభలు నిర్వహించనున్నట్లు తహసీల్దార్‌ విజయకుమార్‌ వెల్లడించారు. గ్రామసభల్లో ప్రజల నుంచి వచ్చే అభ్యంతరాలు, సమస్యలను పరిశీలించి పరిష్కరించేందుకు అవకాశం కల్పిస్తున్నట్లు తెలిపారు.
ప్రతి గ్రామంలో ఓటరు జాబితా సవరణ ప్రక్రియపై ప్రజలకు అవగాహన కల్పించాలని బీఎల్‌వోలు, పంచాయతీ సిబ్బందికి సూచించారు. ప్రక్రియ పారదర్శకంగా, నిబంధనల ప్రకారం జరిగేలా అధికారులు సమన్వయంతో పనిచేయాలని ఆదేశించారు.
కార్యక్రమంలో మండలంలోని వివిధ గ్రామాలకు చెందిన బీఎల్‌వోలు, పంచాయతీ కార్యదర్శులు, ఇతర అధికారులు పాల్గొన్నారు.
కథనానికి సంబంధించిన ట్యాగ్‌లు (Tags):