బిజినపల్లి మండల కేంద్రంలో ఘనంగా బోనాల పండుగ

బిజినపల్లి: నాగర్‌కర్నూల్ జిల్లా బిజినపల్లి మండల కేంద్రంలో మంగళవారం బోనాల పండుగను భక్తిశ్రద్ధలతో ఘనంగా నిర్వహించారు. ఈ సందర్భంగా గ్రామ మహిళలు బోనాలతో ఊరేగింపుగా బయలుదేరి పోచమ్మ గుడికి చేరుకున్నారు. అనంతరం పోచమ్మ తల్లికి నైవేద్యం సమర్పించి, కోడిపుంజులతో మొక్కులు తీర్చుకున్నారు.

‘‘మా గ్రామాన్ని చల్లగా చూడు తల్లి’’ అంటూ పోచమ్మ తల్లిని భక్తులు వేడుకున్నారు. ఈ సందర్భంగా గ్రామంలో పండుగ వాతావరణం నెలకొంది. కార్యక్రమంలో సర్పంచ్ మిద్దె ఇందిరా రాములు, ఉపసర్పంచ్ మహేష్, మిద్దె సూరి, పర్వతాలు యాదవ్‌తో పాటు గ్రామ వార్డు సభ్యులు, గ్రామ పెద్దలు, యువకులు అధిక సంఖ్యలో పాల్గొని బోనాల ఉత్సవాలను ఘనంగా నిర్వహించారు.