లింగాల: నాగర్‌కర్నూల్ జిల్లా లింగాల మండల కేంద్రంలోని అటవీ శాఖ కార్యాలయంపై అవినీతి నిరోధక శాఖ (ఏసీబీ) అధికారులు మంగళవారం దాడులు నిర్వహించారు. ఈ దాడుల్లో అటవీ శాఖ సెక్షన్ ఆఫీసర్ రాంబాబు, బీట్ ఆఫీసర్ మురళీకృష్ణ రూ.50 వేల లంచం తీసుకుంటూ ఏసీబీ అధికారులకు పట్టుబడ్డట్లు సమాచారం.
అటవీ శాఖకు సంబంధించిన ఓ పనిలో అనుకూలంగా వ్యవహరించేందుకు ఇద్దరు అధికారులు లంచం డిమాండ్ చేసినట్లు ఏసీబీ అధికారుల ప్రాథమిక విచారణలో వెల్లడైనట్లు తెలుస్తోంది. పక్కా సమాచారంతో రంగంలోకి దిగిన ఏసీబీ అధికారులు లింగాల అటవీ శాఖ కార్యాలయంలో ప్రత్యేక తనిఖీలు చేపట్టి, లంచం తీసుకుంటున్న సమయంలో ఇద్దరు అధికారులను అదుపులోకి తీసుకున్నట్లు సమాచారం.
అనంతరం ఇద్దరు అధికారులపై కేసు నమోదు చేసి, లంచం వ్యవహారానికి సంబంధించిన పూర్తి వివరాలపై ఏసీబీ అధికారులు దర్యాప్తు కొనసాగిస్తున్నట్లు తెలుస్తోంది. ఈ ఘటనతో లింగాల మండలంలో అటవీ శాఖ కార్యాలయంలో కలకలం రేగింది. దాడికి సంబంధించిన పూర్తి వివరాలను ఏసీబీ అధికారులు అధికారికంగా వెల్లడించాల్సి ఉంది.