‘హర్మూజ్’ నియంత్రణపై యూఎస్‌-ఇరాన్ మాటల యుద్ధం

హర్మూజ్ జలసంధి పూర్తిగా తమ నియంత్రణలో ఉందని అమెరికా అధ్యక్షుడు డొనాల్డ్ ట్రంప్ చేసిన వ్యాఖ్యలను ఇరాన్ తీవ్రంగా ఖండించింది. మాటలతో జలసంధిని ఆధీనంలోకి తీసుకోలేరని ఇరాన్ ఉప విదేశాంగ మంత్రి కాజెమ్ ఘరీబాబాదీ స్పష్టం చేశారు. యుద్ధ నౌకలను మోహరించడం ద్వారా హర్మూజ్‌ను స్వాధీనం చేసుకోవడం సాధ్యం కాదని ఆయన ఎక్స్‌ వేదికగా పేర్కొన్నారు.

అమెరికా బెదిరింపులకు తాము భయపడబోమని, సైనిక ప్రదర్శనలకు లొంగబోమని కాజెమ్ తెలిపారు. ఇరాన్ ఓటమిని అంగీకరించే వరకు హర్మూజ్‌పై దిగ్బంధనాన్ని కొనసాగిస్తామని స్పష్టం చేశారు. జలసంధిని మూసి ఉంచాలా, తెరవాలా అనేది తమ నిర్ణయంపైనే ఆధారపడి ఉంటుందని పేర్కొన్నారు.

హర్మూజ్‌ ద్వారా నౌకలు స్వేచ్ఛగా ప్రయాణిస్తున్నాయని అమెరికా చేస్తున్న వాదనల్లో వాస్తవం లేదని ఇరాన్ విదేశాంగ మంత్రి అబ్బాస్ అరాగ్చీ అన్నారు. గతంలో మాదిరిగానే హర్మూజ్ జలసంధి తమ నియంత్రణలోనే ఉందని, ఇరాన్ సాయుధ దళాల అనుమతి లేకుండా వాణిజ్య నౌకలు ఈ మార్గంలో ప్రయాణించలేవని స్పష్టం చేశారు.

ఇరాన్‌ను యుద్ధంలో ఓడిస్తామని అమెరికా అధ్యక్షుడు ట్రంప్‌ పేర్కొన్నారు. ఇరాన్ ఓటమిని అంగీకరించిన అనంతరం హర్మూజ్‌ను అమెరికా భూభాగంగా ప్రకటిస్తామని ఆయన వ్యాఖ్యానించారు. ఇరాన్ వద్ద అణ్వాయుధ సామర్థ్యం ఉండటం భవిష్యత్తులో ప్రమాదకరంగా మారే అవకాశం ఉందని, అందుకే ఆ సామర్థ్యాన్ని నాశనం చేయాలనే లక్ష్యంతో యుద్ధానికి దిగినట్లు ట్రంప్‌ వెల్లడించారు.

హర్మూజ్‌ జలసంధిపై ఇరు దేశాల పరస్పర విరుద్ధ ప్రకటనలతో ఈ కీలక అంతర్జాతీయ సముద్ర మార్గంపై ఉద్రిక్తత మరింత పెరిగింది.