అమరావతి: రాష్ట్రంలో స్థానిక సంస్థల ఎన్నికల నిర్వహణ దిశగా ప్రభుత్వం కీలక ముందడుగు వేసింది. వెనుకబడిన తరగతుల (బీసీ) రిజర్వేషన్ల ఖరారు కోసం నియమించిన డెడికేటెడ్ కమిషన్ తన అధ్యయనాన్ని పూర్తి చేసి, సమగ్ర నివేదికను ముఖ్యమంత్రికి సమర్పించింది.
విశ్రాంత ఐఏఎస్ అధికారి రాజీవ్ రంజన్ మిశ్రా నేతృత్వంలోని డెడికేటెడ్ కమిషన్ సుప్రీంకోర్టు మార్గదర్శకాలకు అనుగుణంగా కుటుంబ సమగ్ర సర్వే వివరాలను ప్రాతిపదికగా తీసుకుంది. దాదాపు ఆరు నెలల పాటు రాష్ట్రవ్యాప్తంగా పర్యటించిన కమిషన్.. ప్రజాప్రతినిధులు, వివిధ సామాజిక వర్గాల నేతల నుంచి వినతులు స్వీకరించింది. సంక్షేమ శాఖల నుంచి సేకరించిన సమాచారాన్ని క్రోడీకరించి ఆరు సంపుటాల్లో, సుమారు 2,000కు పైగా పేజీలతో నివేదికను సిద్ధం చేసింది.
కమిషన్ సమర్పించిన నివేదికను త్వరలో జరగనున్న మంత్రివర్గ సమావేశంలో చర్చించనున్నారు. అనంతరం శాసనసభ సమావేశాల్లో బీసీ రిజర్వేషన్లకు సంబంధించిన బిల్లును ప్రవేశపెట్టి ఆమోదం పొందేలా ప్రభుత్వం చర్యలు చేపట్టనున్నట్లు సమాచారం.
మంత్రివర్గం, శాసనసభ ఆమోద ప్రక్రియ పూర్తయిన అనంతరం స్థానిక సంస్థల ఎన్నికల నిర్వహణకు అవసరమైన తదుపరి చర్యలు చేపట్టే అవకాశం ఉంది. దీంతో రాష్ట్రంలో స్థానిక సంస్థల ఎన్నికలకు ప్రభుత్వం సమాయత్తమవుతున్నట్లు స్పష్టమవుతోంది.
ముఖ్యాంశాలు:
• సీఎంకు డెడికేటెడ్ కమిషన్ సమగ్ర నివేదిక సమర్పణ
• కుటుంబ సమగ్ర సర్వే ఆధారంగా బీసీ రిజర్వేషన్ల ఖరారు
• ఆరు సంపుటాల్లో 2,000కు పైగా పేజీల నివేదిక
• మంత్రివర్గం, శాసనసభ ఆమోదం తర్వాత ఎన్నికల ప్రక్రియ
కథనానికి సంబంధించిన ట్యాగ్‌లు (Tags):