నాగర్‌కర్నూల్ జిల్లా: ప్రతినిధి ఆవంచ సాల్వాచారి (తొలి కిరణం న్యూస్)
తెలకపల్లి మండల కేంద్రం: ప్రజా సమస్యలను పరిష్కరించాల్సిన ప్రభుత్వ కార్యాలయాల్లో తమకు సరైన స్పందన లభించడం లేదని మండల కేంద్రానికి వచ్చిన ప్రజలు ఆవేదన వ్యక్తం చేస్తున్నారు. సమస్యలు చెప్పుకునేందుకు కార్యాలయాలకు వస్తున్న ప్రజలకు అధికారులు, సిబ్బంది అందుబాటులో ఉండకపోవడం లేదా సరైన సమాధానం ఇవ్వకపోవడంతో తీవ్ర నిరుత్సాహానికి గురవుతున్నామని వారు వాపోతున్నారు.
సమస్య చెప్పేందుకు వెళ్తే.. సంతకాల పనిలో ఎంపీడీవో?
తెలకపల్లి ఎంపీడీవో కార్యాలయంలో సమస్యలపై మాట్లాడేందుకు వెళ్లిన ప్రజలకు సరైన స్పందన లభించడం లేదని పలువురు ఆరోపిస్తున్నారు. ఎంపీడీవోను కలిసేందుకు కార్యాలయానికి వెళ్లినప్పుడు తలుపుకు తెర ఉండటంతో లోపల అధికారి ఉన్నారో, లేదో తెలియని పరిస్థితి ఏర్పడుతోందని చెబుతున్నారు.
చదువుకున్న వారు కార్యాలయంలోని బోర్డులు చూసి లోపలికి వెళ్లగలుగుతున్నారని, తమలాంటి చదువు లేని రైతులు మాత్రం తెర అడ్డుగా ఉండటంతో అధికారి లేరని భావించి వెనుదిరిగి వెళ్లాల్సి వస్తోందని కొందరు ప్రజలు పేర్కొన్నారు. అయితే తెర తొలగించి చూడగా అధికారి సంతకాల పనిలో నిమగ్నమై ఉన్నట్లు కనిపించడంతో తమ సమస్యలను ఎవరికి చెప్పుకోవాలో అర్థం కాలేదని వారు వాపోయారు.
ప్రజల సమస్యలు వినేందుకు కూడా అధికారులకు సమయం లేకపోతే తమ సమస్యలను ఎవరికి చెప్పుకోవాలని ప్రజలు ప్రశ్నిస్తున్నారు.
తహసీల్దార్ కార్యాలయంలోనూ ఇదే పరిస్థితి?
మరోవైపు తెలకపల్లి తహసీల్దార్ కార్యాలయంలోనూ ఇలాంటి అనుభవాలే ఎదురవుతున్నాయని ప్రజలు ఆరోపిస్తున్నారు. సమస్యలపై వివరాలు అడిగేందుకు వెళ్లినప్పుడు కొందరు సిబ్బంది సరైన సమాధానం ఇవ్వకుండా నిర్లక్ష్యంగా వ్యవహరిస్తున్నారని స్థానికులు పేర్కొంటున్నారు.
“ఎస్ఆర్ ప్రక్రియతో అలసిపోయాం” అంటూ సమస్యలపై ప్రశ్నించే ప్రజల నుంచి తప్పించుకునే ధోరణి కనిపిస్తోందని వారు ఆవేదన వ్యక్తం చేస్తున్నారు. ప్రజలు తమ సమస్యను వివరించేందుకు ప్రయత్నించినా పట్టించుకోకుండా వెళ్లిపోతున్నారని ఆరోపిస్తున్నారు.
కార్యాలయంలో ముచ్చట్లు.. సెల్‌ఫోన్లలోనే సమయం?
ప్రజల సమస్యలను తెలుసుకుని పరిష్కార మార్గం చూపాల్సిన సిబ్బంది కార్యాలయంలో ఒకచోట కూర్చొని మాట్లాడుకోవడం, సెల్‌ఫోన్లలో నిమగ్నమవడం సాధారణంగా మారిందని కొందరు ప్రజలు ఆగ్రహం వ్యక్తం చేస్తున్నారు.
కార్యాలయాలకు వచ్చే ప్రజలకు అవసరమైన సమాచారం అందించడం, వారి ఫిర్యాదులను సంబంధిత అధికారుల దృష్టికి తీసుకెళ్లడం వంటి కనీస బాధ్యతలను సిబ్బంది నిర్వర్తించాలని వారు కోరుతున్నారు.
ప్రభుత్వ కార్యాలయాలు ప్రజల కోసం పనిచేయాల్సి ఉండగా.. సమస్యల పరిష్కారం కోసం వచ్చిన ప్రజలే అధికారుల కోసం వేచి చూసే పరిస్థితి రావడం ఏమిటని ప్రశ్నిస్తున్నారు.
ఉన్నతాధికారులు స్పందించాలి
ప్రజా సమస్యల పరిష్కారం కోసం కార్యాలయాలకు వచ్చే ప్రజల పట్ల నిర్లక్ష్యంగా వ్యవహరిస్తున్నారనే ఆరోపణలపై ఉన్నతాధికారులు దృష్టి సారించాలని ప్రజలు కోరుతున్నారు. ఎంపీడీవో, తహసీల్దార్ కార్యాలయాల్లో ప్రజలకు అందుబాటులో ఉండే విధంగా సిబ్బంది పనితీరును పర్యవేక్షించి, సమస్యలకు సకాలంలో పరిష్కారం చూపేలా చర్యలు తీసుకోవాలని డిమాండ్ చేస్తున్నారు.
ప్రజా సమస్యల పరిష్కారమే ప్రభుత్వ కార్యాలయాల ప్రధాన బాధ్యత అని, అధికారులు ప్రజలకు అందుబాటులో ఉండేలా చర్యలు తీసుకోవాలని తెలకపల్లి మండల ప్రజలు కోరుతున్నారు.