కాంగ్రెస్ 420 హామీలను వెంటనే అమలు చేయాలి అంబేద్కర్‌కు టీఆర్‌ఎస్ నాయకుల వినతిపత్రం

బిజినపల్లి: నాగర్‌కర్నూల్ జిల్లా బిజినపల్లి మండల కేంద్రంలో మంగళవారం టీఆర్‌ఎస్ పార్టీ ఆధ్వర్యంలో డాక్టర్ బీఆర్ అంబేద్కర్ విగ్రహానికి వినతిపత్రం అందజేశారు. కాంగ్రెస్ అరాచక పాలనను బిజినపల్లి మండల టీఆర్‌ఎస్ పార్టీ నాయకులు తీవ్రంగా ఖండించారు. ఎన్నికల మేనిఫెస్టోలో అనేక వాగ్దానాలు చేసి అధికారంలోకి వచ్చిన కాంగ్రెస్ ప్రభుత్వం 1000 రోజుల పాలనలో తెలంగాణ ప్రజలకు చేసిందేమీ లేదని నాయకులు మండిపడ్డారు. కాంగ్రెస్ ప్రభుత్వం అధికారంలోకి వచ్చిన 100 రోజుల్లోనే ఆరు గ్యారంటీలను అమలు చేస్తామని కామారెడ్డి డిక్లరేషన్‌లో రాహుల్ గాంధీ, రేవంత్ రెడ్డి హామీ ఇచ్చారని, కానీ ఇప్పటివరకు ఒక్క హామీ కూడా పూర్తిస్థాయిలో నెరవేర్చకుండా తెలంగాణ ప్రజలను నట్టేట ముంచిందని విమర్శించారు. కాంగ్రెస్ ప్రభుత్వం ఇచ్చిన 420 హామీలను వెంటనే అమలు చేయాలని డిమాండ్ చేశారు. ఈ కార్యక్రమంలో బిజినపల్లి మాజీ ఎంపీపీ శ్రీనివాస్ గౌడ్, రైతు సమన్వయ సమితి అధ్యక్షులు నెల్లికంటి మహేశ్వర్ రెడ్డి, పాలెం సర్పంచ్ రామకృష్ణ, మంగనూరు టీఆర్‌ఎస్ పార్టీ సీనియర్ నాయకులు జగదీశ్వర్ రెడ్డి, వెలుగొండ సర్పంచ్ నాగిరెడ్డి, బిజినపల్లి మాజీ ఎంపీటీసీ బాలస్వామి తదితరులు పాల్గొన్నారు. వివిధ గ్రామాల నుంచి టీఆర్‌ఎస్ పార్టీ నాయకులు, కార్యకర్తలు పెద్ద ఎత్తున హాజరై అంబేద్కర్‌కు వినతిపత్రం అందజేశారు.