గోపాల్‌పేటలో ‘కంటి వెలుగు’.. 250 మందికి పరీక్షలు, 50 మందికి ఉచిత ఆపరేషన్లు

వనపర్తి జిల్లా గోపాల్‌పేట మండల కేంద్రంలో ఫినిక్స్ ఫౌండేషన్ ఆధ్వర్యంలో హైదరాబాద్ శంకర నేత్రాలయం వైద్యులచే కంటి పరీక్షల శిబిరాన్ని నిర్వహించారు. గోపాల్‌పేట సర్పంచ్ శ్రీమతి కర్రోళ్ల స్వప్న భాస్కర్ ఆధ్వర్యంలో నిర్వహించిన ఈ శిబిరానికి ప్రజల నుంచి విశేష స్పందన లభించింది. ఈ సందర్భంగా 250 మందికి పైగా ప్రజలకు కంటి పరీక్షలు నిర్వహించగా, వారిలో సుమారు 50 మందికి శస్త్రచికిత్సలు అవసరమని వైద్యులు గుర్తించారు. అవసరమైన వారికి ఉచితంగా కంటి శస్త్రచికిత్సలు నిర్వహిస్తామని శంకర నేత్రాలయం వైద్యులు తెలిపారు. ఈ సందర్భంగా సర్పంచ్ కర్రోళ్ల స్వప్న భాస్కర్ మాట్లాడుతూ గోపాల్‌పేట గ్రామపంచాయతీ పరిధిలో ప్రజలకు కంటి సంబంధిత సమస్యలు ఉంటే వైద్యులతో పరీక్షలు చేయించి, అవసరమైన వారికి కళ్లద్దాలు అందించడంతో పాటు శస్త్రచికిత్సలు సైతం పూర్తయ్యేలా తన వంతు సహకారం అందిస్తానని తెలిపారు. ప్రజల ఆరోగ్య పరిరక్షణకు గ్రామపంచాయతీ తరఫున ఎల్లప్పుడూ ముందుంటానని పేర్కొన్నారు. ఈ కార్యక్రమంలో బుద్ధారం సర్పంచ్ శేఖర్, సాకలపల్లి సర్పంచ్ శేషిరెడ్డి, మందడి తిరుపతిరెడ్డి, గోపాల్‌పేట టీఆర్‌ఎస్ టౌన్ ప్రెసిడెంట్ రాజేష్ రెడ్డితో పాటు గ్రామ పెద్దలు, యువకులు, ప్రజలు అధిక సంఖ్యలో పాల్గొన్నారు.