హైదరాబాద్: చారిత్రక హైదరాబాద్ ఒరిజినల్ సిటీ (ఓల్డ్ సిటీ)ని అన్ని రంగాల్లో అభివృద్ధి చేసేందుకు రాజకీయాలకు అతీతంగా శాయశక్తులా కృషి చేస్తామని ముఖ్యమంత్రి ఎ. రేవంత్ రెడ్డి హామీ ఇచ్చారు. దేశంలోనే అభివృద్ధి చెందిన అతిపెద్ద నగరంగా హైదరాబాద్‌ను తీర్చిదిద్దాలనే సంకల్పంతో ప్రభుత్వం పనిచేస్తోందని తెలిపారు.
చంచల్‌గూడ నుంచి సంతోష్‌నగర్ వరకు 3.2 కిలోమీటర్ల మేర నిర్మించిన స్టీల్ ఫ్లైఓవర్‌ను సీఎం రేవంత్ రెడ్డి ప్రారంభించారు. అనంతరం చంచల్‌గూడ ప్రభుత్వ డిగ్రీ కాలేజీ మైదానంలో ఏర్పాటు చేసిన సభలో ఆయన ప్రసంగించారు.
ఈ సందర్భంగా ఓల్డ్ సిటీకి పలు అభివృద్ధి వరాలను ప్రకటించారు. చంచల్‌గూడ ప్రభుత్వ డిగ్రీ కాలేజీ అభివృద్ధికి రూ.25 కోట్లు మంజూరు చేస్తున్నట్లు వెల్లడించారు. నెల రోజుల్లోగా దీనికి సంబంధించిన జీవో జారీ చేయడంతో పాటు, వచ్చే ఏడాదిన్నరలోగా పనులు పూర్తయ్యేలా పర్యవేక్షించాలని మలక్‌పేట ఎమ్మెల్యే అహ్మద్ బిన్ అబ్దుల్లా బలాలాను సీఎం ఆదేశించారు.
హైదరాబాద్ ఎంపీ అసదుద్దీన్ ఓవైసీ ప్రస్తావించిన పలు అభివృద్ధి పనులన్నింటినీ మంజూరు చేస్తామని సీఎం స్పష్టం చేశారు. విద్యాభివృద్ధి కోసం ప్రభుత్వం ఎంతైనా ఖర్చు చేసేందుకు సిద్ధంగా ఉందని పేర్కొన్నారు.
అలాగే రూ.500 కోట్లతో మీరాలం ట్యాంకును అద్భుతమైన పర్యాటక కేంద్రంగా అభివృద్ధి చేస్తున్నామని తెలిపారు. ఆరాంఘర్ ఫ్లైఓవర్, శాస్త్రిపురం ఫ్లైఓవర్ పనులు పూర్తయ్యాయని, అండర్‌గ్రౌండ్ కేబుల్, రోడ్ల అభివృద్ధి పనులు కొనసాగుతున్నాయని వివరించారు.
భూసేకరణ ప్రక్రియ దాదాపు పూర్తయిన నేపథ్యంలో వచ్చే డిసెంబర్‌లో గౌలిగూడ నుంచి చాంద్రాయణగుట్ట వరకు మెట్రో రైలు విస్తరణ పనులు ప్రారంభిస్తామని ముఖ్యమంత్రి ప్రకటించారు.
ఓల్డ్ సిటీ సమగ్ర అభివృద్ధికి ప్రభుత్వం కట్టుబడి ఉందని సీఎం రేవంత్ రెడ్డి స్పష్టం చేశారు.
కథనానికి సంబంధించిన ట్యాగ్‌లు (Tags):