రెండు రోజుల్లో 22-A జాబితా నుంచి నిజమైన ప్రైవేట్ ఆస్తుల తొలగింపు!

ఈ సందర్భంగా సీతారాం నగర్, బాలరాం నగర్, ఆదర్శ్ నగర్, మల్లికార్జున నగర్, కాకతీయ నగర్, డిఫెన్స్ కాలనీ, జుపల్లి హోమ్స్ గేటెడ్ కమ్యూనిటీ, ఆర్.కె. పురం ఆఫీసర్స్ కాలనీ, ఈస్ట్ ఆనంద్‌బాగ్–శ్రీనగర్ కాలనీ, అల్వాల్–శ్రీధామ్ కాలనీ తదితర ప్రాంతాలకు చెందిన ప్రతినిధులు తమ ఆస్తులకు సంబంధించిన టైటిల్, లింక్ డాక్యుమెంట్లతో పాటు వినతిపత్రాలను కలెక్టర్‌కు సమర్పించారు.

నిజమైన ప్రైవేట్ ఆస్తులను ULC/22-A నిషేధిత జాబితా నుంచి తొలగించి, చట్టబద్ధమైన ఆస్తి యజమానులు తమ ఆస్తులపై హక్కులను స్వేచ్ఛగా వినియోగించుకునే అవకాశం కల్పించాలని వారు కోరారు. ముఖ్యంగా ఆర్.కె. పురం ఆఫీసర్స్ కాలనీ, డిఫెన్స్ కాలనీ, సీతారాం నగర్‌లోని సర్వే నంబర్లు 109, 111కు సంబంధించిన దీర్ఘకాలిక టైటిల్ రికార్డులను కలెక్టర్ దృష్టికి తీసుకువచ్చారు.

వినతిపత్రాలు, సమర్పించిన ఆధార పత్రాలను పరిశీలించిన జిల్లా కలెక్టర్ మను చౌదరి స్పందిస్తూ.. రెండు రోజుల్లో తగిన చర్యలు తీసుకుంటామని హామీ ఇచ్చారు. ఆధార పత్రాలు సమర్పించిన సర్వే నంబర్లను పరిశీలించి, అర్హత ఉన్న నిజమైన ప్రైవేట్ ఆస్తులను 22-A నిషేధిత జాబితా నుంచి తొలగించేందుకు అవసరమైన చర్యలు చేపడతామని తెలిపారు.

టైటిల్, లింక్ డాక్యుమెంట్ల ద్వారా వ్యక్తిగత ఆస్తి యజమానులు తమ యాజమాన్య హక్కులను నిరూపించగలిగితే, అలాగే ULC చర్యల కింద ప్రభుత్వం సంబంధిత భూమిని స్వాధీనం చేసుకోకపోతే, సుప్రీంకోర్టు తీర్పుల ప్రకారం చట్టబద్ధమైన యాజమాన్య హక్కులు రక్షించబడతాయని కలెక్టర్ వివరించారు.

ఈ సందర్భంగా ఎమ్మెల్యే మర్రి రాజశేఖర్ రెడ్డి మాట్లాడుతూ.. నిజమైన ఆస్తి యజమానుల సమస్యల పరిష్కారానికి తన పూర్తి సహకారం అందిస్తానని తెలిపారు. 22-A జాబితాలో ఆస్తులు చేర్చబడిన కారణంగా చట్టబద్ధమైన యజమానులు అనవసర ఇబ్బందులు ఎదుర్కోకుండా సంబంధిత అధికారులతో సమన్వయం చేస్తామని చెప్పారు.

సమస్యను త్వరితగతిన పరిష్కరించి, అర్హులైన ఆస్తి యజమానులకు న్యాయం జరిగేలా తన వంతు కృషి చేస్తానని ఎమ్మెల్యే హామీ ఇచ్చారు.

అదేవిధంగా నేరేడ్మెట్ రామకృష్ణాపురానికి చెందిన తెలంగాణ రజక (దోబీ) సేవా సంఘం ప్రతినిధులు కూడా ఎమ్మెల్యే ఆధ్వర్యంలో జిల్లా కలెక్టర్‌ను కలిశారు. సర్వే నంబర్ 222లో కేటాయించిన 10 గుంటల స్థలంలో వాషింగ్ వర్క్‌షెడ్, బోర్‌వెల్ పంప్‌హౌస్, ప్రహరీ గోడ నిర్మాణానికి అవసరమైన నిధులు మంజూరు చేయాలని వినతిపత్రం సమర్పించారు.

ఈ వినతిపై జిల్లా కలెక్టర్ సానుకూలంగా స్పందించి, అవసరమైన చర్యలు తీసుకుంటామని హామీ ఇచ్చారు.

ఈ సమావేశంలో బి.టి. శ్రీనివాసన్, రాఘవేంద్రరావు, అచ్యుత్ రావు, గోపాల్ రెడ్డి, మోహన్ కుమార్, రఘుదేవ్, మహాపాత్ర, రఫీక్, నరేష్, రాము యాదవ్, డోలి రమేష్, శ్రీధర్ గౌడ్, భాస్కర్ రెడ్డి, జైపాల్ రెడ్డి, శోభన్ బాబు, శివ యాదవ్, రమేష్, చిందం శ్రీనివాస్, జె.కె. సాయి, రామకృష్ణ, కపిల్ రావు, ఈశ్వరరావు, అనిల్ రెడ్డి, శ్రీనివాస్తో పాటు రజక సంఘం సభ్యులు కృష్ణ, కిషన్, శంకర్, రాములు, బాలరాజ్, ప్రభావిత కాలనీల ప్రతినిధులు పాల్గొన్నారు.